فى ذكرى قطار كفر الدوار

يا عم يا بتاع القطر الدوار
القطر اللى كان دايخ وعنده دوار
وطار فوق الميدان ف كفر الدوار
ف خش ف ميت ناس ودوار
دهس العربية والسواق والحمار
والولية والصبية والواد الصرصار
افتكر نفسه طياره ودا مطار
وقع واقعه سوده قلبت باحمرار
خد عويس ف سكته الغدار
وخد لعويس من زناتى بالتار
ريح الجوز م الانتظار
جاب داغ دماغ مش عاجبها باستمرار
رجع غايب عن الأذهان مسح أفكار
عزل مناصب.. هزأ ناس كبار
فجر دموع.. سبب عواصف وأمطار
حد مات له..أو كره خطه..قرر الانتحار.

ياعم يا بتاع القطر القشاش
قطرك غير واضح وغشاش
لفلنا الدنيا ف جرايد وشاش
ورانا الويل سبع توشاش
وايه حديد وازاز وايه قماش
قطرك النهارده طاش
خد ف وشه ماخلاش
حتى الناس اللى ما طلهاش ...

وطنى رجع بالسلامه ..ونصه ماجاش
نصيبه ونصيب اكبر عيله ف بر مصر..عيلة طناش
آخر الخط قرب..لحد هنا ولسه مافهمناش.

يا عم يا بتاع القطر التوربينى
واجهنى بنفسى وسنينى
اعمل معروف يا بايعنى اشترينى
اركنى على هامش هوامشك..بلاش ترمينى
الدنيا من غيرك مطرح صغير تحت توربينى.

يا عم يا بتاع القطر المجرى
على مهله وهو بيجرى
واخدها جد ودوغرى
دخل شمال فى اهل بلدى
كسر جناح ضعيف ومهرى
قطم وسط عنادى وكشف امرى
جرح صورة زمانى وخنق صبرى
جرا? ياحضرات ومن بدرى

يا عم يا بتاع القطر الفشوش
ما شافش الاعمى
و المفتح ما شافوش
ما فرقش بين النجار والشاكوش
كبير صغير ما هموش
غلبان مفترى على بعض ماجوش
تحت العجل ما تلحقش تحوش
بدريه خرجت م الصبحيه
الست حامل وجوزها عامل عمليه
عندها أمل واحلام ورديه
طموحها تبقى غنيه
طلعت بمسمارين أبلاتين
وكرسى متحرك هديه

كان عنده بيت جدو
عايش فيه لوحده
عامل وياه دويتو
بيحبه ك بنت بنته
خايف عليه زلزال يهده
جا وهو فيه القطر هده
بيفتح الباب..لقاه بيسده
وحيد وحب يوده
كتر خيره..خدوا وداه لستو

عليوه لسه خارج م المستشفى
بعد رقده طويله نفسه يتمشى
رفع بقى ف عود المقشه
كان عنده تعب فى المخ زى قفشه
ما سلمش.. خدله م القطر لطشه
حوضه انكسر مش مشكله..جاتله روشه
ماعدش بيسمع غير شخلله ودوشه
ويشوف حاجات من غير ملامح وحشه
منعوا الزياره عنه..بتسبب لزواره رعشه
من الضحايا جاموسه
دبيحه عشان العروسه وكلب!
مالوش غير انه فى أى حد يهب
وشابه معروفه بانها مهووسه بافلام الرعب
الحقيقه كانت مفاجأه علينا كلنا..وموقف صعب

الست كانت راكبه تاكسى
ونازله لابسه ربع مكسى
وعيون الخلق وراها بتجرى
زيد وعبيد ومعاهم مرسى
الله يرحمه ما لحقش يقوم..دفنوه بالكرسى

يا عم يا بتاع السكه الحديد
نهارك سعيد
ما تشوفلك شغله تانيه
خليك مفيد
انا وانت ظلمنا القطر المسكين
كام عيد ميلاد تحول لسنويه ف غمضة عين
كام عيد أم اسودت طرحته وناسه مدمعين
كام ذكرى حلوه اتمرمغت ف دم وطين
كل سنه وحضراتكو طيبين
والسنه الجايه يبقوا بدل القطر اتنين
طول ما احنا بنشربها وساكتين
واسرع حاجه ننساها الميتين

قطر بغزاله قطر ب حالات
ياعم يا بتاع القطرات
عاوزين نعمل فى البيت فلنكات
احتياطى يعنى بعد اللى فات
قصدى اللى مات
واللبيب يفهم بالاشارات

» قبل اى حد جدول امتحانات الصف الاول الثانووى الترم التانى بكفر الدوار